ايه اهم البرامج المعمارية وازاي تختار البرامج الي تتعلمها ؟

ايه اهم البرامج المعمارية وازاي تختار البرامج الي تتعلمها ؟ ✍

من اكتر الاسئلة اللى بتتبعتلي من اي حد عاوز يتعلم البرامج هوا إيه الفرق بينها وبين بعضها وايه الي انا محتاج اتعلمه فعلا؟؟
.في البوست دا هساعدك تفهم الفروق الاساسيه بين البرامج المختلفه الي بنحتاجها عشان تقدر تقرر ايه الانسب ليك

:هنتكلم عن 👈
الماكس◀الريڤيت◀الاسكتش اب◀الكاد◀الفوتوشوب◀اللوميون◀الراينو◀الجراسهوبر◀
بعد ما تتفرج على الفيديو و تقرأ البوست هتقدر تفهم الفروق بين البرامج دي و مش هتضيع وقتك ولا فلوسك وانت بتاخد كورس غلط وهتركز على انت عاوزة وبالتالى هتحقق اهدافك اسرع باذن الله

مبدأيا انت لازم تفهم انك محتاج 4 انواع من البرامج

برنامج يرسم تو دي ⇐ يعني بلانات وقطاعات وتنفيذية والحاجات دي
برنامج يرسم ثري دي ⇐ و دة هيطلعلك المناظير بأنواعها الداخلي والخارجي وبعض الدراسات الي بنعملها
برنامج يرندر المناظير ⇐ يعني يحطلها الماتيريالات والاضاءات ويخرج الصور النهائية بتاعتها
برنامج يعدل على الصور ⇐ يعدل ويجمع الصور و يضيف التكست ويفنش الشغل بتاعك بشكل عام


ودي تعتبر الحاجات الاساسية بس - طبعا ممكن تحتاج شوية برامج تانية متخصصة للانميشن مثلا او برنامج افراد للماكيتات او شوية بلاجنز تساعد في بعض المهام، ولكن احنا في الفيديو دا هنركز على الاساسيات عشان منطولش عليكم

اول حاجة اداة الرسم التو دي ودا بينافس عليه برنامجين اساسيين: الاوتوكاد والريڤت

     قبل ما اتكلم عن البرنامجين دول لازم تعرف حاجة مهمة جدا، و هي انه مينفعش تشتغل ببرنامج تكون انت لوحدك بس الي بتشتغل بيه حتى لو كان اعظم برنامج في الدنيا لانك مش هتعرف تشتغل بيه في فريق، مش هتعرف تدي فايلاتك لحد ولا حد يكمل وراك وهتبقى في ازمة كبيرة.

     انا اول ما اتعلمت تو دي كنت بشتغل على برنامج اسمه اركي كاد وكان متميز جدا وقتها ولكن جيت في مشروع التخرج بتاعي لما جم مجموعة من الشباب الصغيرين يحاولوا يساعدوني في تبييض بلاناتي، وقتها اضطريت احول كل شغلي اوتوكاد عشان يقدرو يشتغلوا معايا، على الرغم اني كنت بقالي 4 سنين شغال اركي كاد ولكن عشان كل المجتمع الي كان حواليا شغال اوتوكاد فكان لازم احول

و دي نقطة تحطها في اعتبارك: لازم تشتغل بنفس البرامج الي موجودة في المجتمع الي حواليك، أو على الاقل تكون بتعرف تشتغل بيها، و لو ظهر حاجة تانية افضل لازم تكون فاهم ازاى تحول بين البرامج و بعضها بسهوله

    نرجع لبرامج رسم الـ تو دي : الاوتوكاد هو الاقدم والاكثر انتشارا واغلب المكاتب المعمارية شغاله بيه ولكن مؤخرا ظهر الريڤيت وبدا يعمل نفس مهمات الكاد بطريقة اسرع واسهل وابسط، وكمان دمج معاه حاجة اسمها Building information modeling
ودي حاجة مهمة جدا يعرف قيمتها المكاتب والشركات الكبيرة.

     وفيه نقطة كمان تاخد بالك منها، مؤخرا بدات كل البرامج تعمل كل حاجة، يعني معظم امكانيات الريڤيت هتلاقيها بدات تظهر في الكاد وتلاقي البرنامجين هما الاتنين بيعملوا كمان حاجات ثري دي، بس اوعى تقع في الفخ دا - خلي كل برنامج متخصص في مجاله، متحاولش تشتغل ببرنامج واحد انه يعمل كل حاجة - لانه هيباه ضعيف في كل حاجة، انما لو اتعلمت كل برنامج بتخصصه هتطلع اقوى حاجة في كل مجال

من الاخر لو هتسافر برا مصر - يبقى اتعلم ريڤيت هيبقى اهم بالنسبالك - جوا مصر الكاد مازال مطلوب ولكن الريڤيت هو القادم. لو اتعلمت الاتنين يبقى أفضل طبعا و هما برنامجين سهلين تقدر تتعلمهم بسهولة و هيكون في كورسات فيهم على السايت بتاعنا قريب جدا

:تانى حاجة برامج رسم الثري دي
 الريڤيت - الماكس - المايا - الاسكتش اب - الراينو ومعاه الجراسهوبر

مبدأيا هنستبعد الريڤيت من انه يبقى متخصص ثري دي - هوا طبعا يقدر يعمل حاجات ثري دي، بس زى ما قلنا التخصص افضل لان الريڤيت في الثري دي ليه حدود ومتقدرش تعمل بيه كل حاجة، خليك في التخصص

    نبدأ بـ 
الإسكتش اب - عشان دا ابسطهم، بس بردو بساطته دي خليته محدود شوية في امكانياته. هو سهل في تعلمه ودا بيخلي الناس تبدأ بيه، بس المشكلة ان في الغالب اللي بيبدأ بالاسكتش اب بيقابل صعوبة كبيرة يخرج منه لحاجة متطورة اكتر وبيفضل دايما محدد نفسه بعوائق ملهاش لازمة. خلينا ندخل على البرامج المهمة - كل ما بدات بدري فيهم كل ما كانت فرصتك انك تتقنهم اسرع


     مبدأيا الماكس هو الاشهر في الوسط المعماري في مصر والخليج الي هما يعتبروا الاسواق بتاعتنا، وتقدر تقول هو اهم حاجة المكاتب بتدور عليها وهيا بتعين اي مصمم عندها، ودا يستبعد المايا شوية لأنه قريب من الماكس في حاجات كتير ولأنه نادرا لما تلاقي مكتب او شركة شغالين بالمايا في المجتمع بتاعنا

    بالنسبة لـ الراينو الجراسهوبر، هما برنامجين بيشتغلو مع بعض و يعتبروا متخصصين اكتر في الباراميترك مودلينج، يعني بيعملوا الرسومات الثري دي بناء على معادلات حسابيه، وتقدر تعدل في الموديل بتاعك بناء على التعديل في المتغيرات الرقمية جوا المعادلات دي، و طريقة الشغل دى منتشرة اكتر برا في اوروبا والدول المتقدمة - عندنا تقريبا مش موجوده الا في بعض الاعمال البحثيه، ولكن في السوق تعتبر نادرة

     و بـ كدا مش فاضل في جزئية الرسم الثري دي غير الكينج بتاعنا وهوا برنامج الماكس و دا عشان السوق والمجتمع المعماري بتاعنا كله بيستخدمه، بالإضافة لأنه بالفعل برنامج متميز جدا في شغل الثري دي وتقدر من خلاله تعمل كل الي انت عاوزة، وكمان هتلاقي ليه دروس وكورسات في كل حتة عالنت وفي مراكز التدريب الي حواليك، و دا بيخليه من السهل جدا انك تتعلمه

ولو عاوز تتعلمه وتفهمه بطريقة بسيطة وفعاله تقدر تعمل دة من خلال كورس 
البداية الصح في الماكس المعماري
عشان تعرف اكتر عن الكورس، هتلاقي كل التفاصيل من



تالت حاجة هتحتاج برنامج يعمل اخراج للشغل الثري دي الي عملته
اللوميون - الفيراي - ارنولد - كورونا

    برنامج 
اللوميون منفضل لوحده، على عكس الباقيين اللي يعتبروا برامج ملحقة بالماكس، و اللوميون برنامج سهل جدا وبدأ يتطور مؤخرا بشكل كبير ويطلع نتايج هايله. فكرته انه بعد ما بتخرج الموديل من الماكس بتدخله اللوميون وتبدأ تضيفله الماتيريالات والاضاءات، و هو بيخرجلك الصور على طول بطريقة مباشرة تقريبا، و بيستخدم اكتر في الانيميشن

     نيجي للبرامج الي بتستخدم مع الماكس: هتكلم عن الڤيراي بإعتباره الأشهر والأكثر إستخداما، دة غير إنه يتعبر من اسرع البرامج مقارنة بالجودة بتاعته. الڤيراي مش بيستخدم مع الماكس بس، دا ممكن كمان يشتغل مع المايا ومع الاسكتش اب. الناس الي عاملينه مهووسين بالواقعيه والبرنامج نفسه بيحاكي فيزياء الواقع بطريقة بسيطة. يعني لو فهمت الواقع حواليك ماشي ازاي تقدر بسهولة تطلع من الڤيراي نتايج متميزة جدا

الطريقة دي بالفعل بيتم تطبيقها في كورس البداية الصح في الماكس المعماري، هتلاقينا شارحين الفيراي بطريقة تخليك تفهم الواقع حواليك و بمجرد ما تحاول تحاكية جوا الماكس هتطلع نتايج متميزة باذن الله


رابع حاجة برنامج يعدل على الصور الي هتخرجها
 
وطبعا الرائد في المجال دا هوا الفوتوشوب. في برامج كتير ممكن تعمل تعديلات ولكن الشوب بدون شك هو الاصل، وعشان كدا مفيش داعي لذكر اى بدايل. الفوتوشوب من اهم البرامج الي هتحتاجوها خاصة في تجميعات المشروعات او تفنيش الشغل بشكل عام



كدا انتوا عرفتوا اهم الفروق بين البرامج... بالنسبة لـ ترشيحاتي الشخصيه فـ انا بنصح تستخدموا في التو دي برنامج الريڤيت - و في الثري دى الماكس - و في الرندر تستخدموا الڤيراي - و في التعديل الفوتوشوب

وبالتوفيق ليكم جميعا باذن الله

✌✌ لو عجبك البوست و إستفدت منه متنساش تعمل كومنت وتقولنا رأيك و تعمل شير عشان تفيد غيرك

1 2
>